May 20, 2026
गुरुवर्य रा.वि. पाटणकर सर्वोदय विद्या मंदिर माध्यमिक व उच्च माध्यमिक विद्यालयातील शिक्षक श्री.संतोष नवले व श्री.सचिन लगड यांनी नुकत्याच अकोले येथे पार पडलेल्या जनगणना २०२७ प्रशिक्षण कार्यक्रमामध्ये सहभागी होऊन फिल्ड ट्रेनर म्हणून अत्यंत प्रभावी कामगिरी बजावली. दोघांनीही आपल्या प्रभावी संवाद कौशल्याने व उत्कृष्ठ संगणकीकृत सादरीकरणाच्या माध्यमातून प्रगणक तसेच पर्यवेक्षकांना जनगणना मोहिमेचे प्रशिक्षण देऊन त्यांना सखोल मार्गदर्शन केले. ‘फिल्ड ट्रेनर’ म्हणून नियुक्ती झाल्यानंतर दोघांनाही अहिल्यानगर येथे प्रशिक्षणासाठी पाठविण्यात आले होते.
श्री.संतोष नवले व श्री.सचिन लगड हे दोघेही राज्यशास्त्र व इतिहास विषय-शिक्षक असून विविध शैक्षणिक व सामाजिक कार्यात नेहमी अग्रेसर असतात. तालुकास्तरावरील जनगणना मोहिमेसाठी ‘फिल्ड ट्रेनर’ म्हणून या दोघांनी आपली निवड सार्थ ठरवत तालुक्यामध्ये विद्यालयाचा नावलौकिक वाढविला.
या जनगणना मोहिमेसाठी एकूण ४५८ प्रगणक व ६९ पर्यवेक्षकांची नियुक्ती करण्यात आली असून त्यांना टप्प्याटप्याने प्रशिक्षण देण्यात आले आहे. यावर्षीची जनगणना पारंपरिक कागद-पेनऐवजी पूर्णपणे डिजिटल पद्धतीने होणार असल्याने माहिती अधिक अचूक, सुरक्षित व वेगवान पद्धतीने संकलित होणार आहे. ही जनगणना अकोले तालुक्याचे तहसीलदार डॉ. सिद्धार्थ मोरे यांच्या मार्गदर्शनाखाली पार पडत आहे.
जनगणना दोन टप्प्यांत होणार असून पहिल्या टप्प्यात इमारत व घरगणना केली जाणार आहे. ही प्रक्रिया जलद व पारदर्शक असून हे राष्ट्रीय कर्तव्य आहे. प्रत्येक नागरिकाने जबाबदारीने अचूक माहिती नोंदवणे आवश्यक आहे. प्रशिक्षणामुळे प्रगणक व पर्यवेक्षक अधिक सक्षमपणे माहिती संकलित करून जनगणना यशस्वी करत आहेत.
या जनगणना मोहिमेसाठी विद्यालयातील शिक्षक श्री.सुरेश शेटे, श्री.अमोल तळेकर, श्री.विकास जोरवर, श्री.संतराम बारवकर व श्री.महेश दिंडे यांनी देखील रणरणत्या उन्हाची तमा न बाळगता ‘प्रगणक’ म्हणून प्रभावीपणे कामकाज पार पाडले. श्री.संतोष नवले व श्री.सचिन लगड व त्याचबरोबर सर्व प्रगणकांचे विद्यालयाचे प्राचार्य श्री.भाऊसाहेब बनकर व उपप्राचार्य श्री.दिपक बुऱ्हाडे व त्याचबरोबर सर्व शिक्षक-शिक्षकेतर कर्मचाऱ्यांनी कौतुक करत हे आव्हानात्मक राष्ट्रीय कार्य यशस्वीरीत्या पार पाडल्याबद्दल त्यांचे अभिनंदन केले.
 श्री.संतोष नवले |
 श्री.सचिन लगड |
