April 1, 2026
शिक्षण हक्क कायद्यानुसार (RTE Act, 2009) शिक्षक होण्यासाठी TET आणि CTET परीक्षांची आवश्यकता आहे. शालेय शिक्षणाचा दर्जा राखण्यासाठी आणि शिक्षकांकडे आवश्यक अध्यापन कौशल्ये व ज्ञान असल्याची खात्री करण्यासाठी या पात्रता परीक्षा अनिवार्य केलेल्या आहेत. या परीक्षा उत्तीर्ण झाल्याशिवाय कोणताही उमेदवार सरकारी किंवा अनुदानित शाळांमध्ये शिक्षक भरती प्रक्रियेसाठी पात्र ठरू शकत नाही.
TET ही परीक्षा प्रामुख्याने राज्य सरकारद्वारे आयोजित केली जाते आणि ती उत्तीर्ण झालेले उमेदवार केवळ त्याच राज्यातील सरकारी किंवा अनुदानित शाळांमध्ये शिक्षक होण्यासाठी पात्र ठरतात. CTET ही परीक्षा केंद्र सरकारद्वारे राष्ट्रीय स्तरावर आयोजित केली जाते आणि ती उत्तीर्ण झालेले उमेदवार संपूर्ण भारतातील केंद्रीय विद्यालये (KVS), नवोदय विद्यालये (NVS) आणि केंद्रशासित प्रदेशांमधील शाळांमध्ये नोकरीसाठी पात्र ठरतात. महाराष्ट्रासह अनेक राज्यांनी आता CTET उत्तीर्ण उमेदवारांनाही आपल्या राज्याच्या भरती प्रक्रियेत सामावून घेण्याचा निर्णय घेतला आहे.
गुरुवर्य रा.वि. पाटणकर सर्वोदय विद्या मंदिर माध्यमिक व उच्च माध्यमिक विद्यालयातील श्रीमती रोहिणी सानप, श्रीमती रीना राठोड, श्रीमती कांचन मेंगाळ व कु.प्रियांका खराटे या चार शिक्षिकांनी नुकत्याच झालेल्या CTET परीक्षेत चांगल्या गुणांनी उत्तीर्ण होऊन विद्यालयाचा नावलौकिक वाढविला. अतिशय आव्हानात्मक समजल्या जाणाऱ्या या केंद्रीय स्तरावरील शिक्षक पात्रता परीक्षेमध्ये विद्यालयातील या महिला शिक्षिकांनी मिळविलेल्या यशाबद्दल त्यांचे सर्वत्र कौतुक होत आहे.
या यशाबद्दल विद्यालयाच्या वतीने त्यांचा सत्कार करून कौतुक करण्यात आले. विद्यालयाचे प्राचार्य श्री.भाऊसाहेब बनकर, उपप्राचार्य श्री. दिपक बुऱ्हाडे, पर्यवेक्षक श्री.गोरख मालुंजकर व त्याचबरोबर सर्व शिक्षक-शिक्षकेतर कर्मचाऱ्यांनी त्यांचे कौतुक करत अभिनंदन केले. पुष्पगुच्छ देऊन त्यांचा सत्कार करण्यात आला व पुढील शैक्षणिक वाटचालीसाठी त्यांना शुभेच्छा देण्यात आल्या.
